Dansibandsfestivalurin 2020

Nú tað er greitt, at Korona-tilmælini fyri summarið ikki verða broytt og tað verður frámælt at hava størri tiltøk, stevnur og festivalar, so eru vit tíverri noydd at boða frá, at ongin Dansibandsfestivalur verður í 2020.

Dansibandsfestivalur verður tó aftur í Vági vikuskiftið 30. apríl – 1. mai 2021.

Vit eru sera fegin um tann stóra áhugan fyri Dansibandsfestivalinum og greitt er eisini, at Dansibandsfestivalurin 2020 skuldi verða tann størsti nakrantíð. Kampingplássið var útselt og forsølan av vikuskiftispassum hevur ongantíð verið so góð – og skráin við bestu dansibandsorkestrunum úr Norra og Føroyum borgaði fyri góðsku og upplivingum fyri lívið.
Tær upplivingarnar eru nú útsettar til 2021 – og vit gleða okkum at taka ímóti festivalgestum um mánaðarskifti apríl-mai 2021.

Kunnu flyta atgongumerkini til 2021 – ella fáa pengarnar aftur!
Nú Dansibandsfestivalurin 2020 er avlýstur kunnu tey nógvu, sum hava keypt vikuskiftispass, velja at flyta vikuskiftispassið til 2021. Eisini kunnu tey, sum hava bílagt og goldið fyri kampingpláss flyta teirra bílegging til 2021.

Vit vóna, at tey flestu taka av møguleikanum at flyta vikuskiftispassini og bíleggingarnar av kampingplássinum til 2021.

Ynskja fólk hinvegin at fáa peningin afturgoldnan, so ber til at fáa gjaldið fyri vikuskiftispassið endurgoldið (tó undantikið avgreiðslugjaldið á 20,- kr.). Fólk kunnu eisini fáa endurgoldið gjaldið fyri kampingpláss (tøk kampingpláss verða boðin teimum, sum eru á bíðilista).

Tey, sum ynskja peningin endurgoldnan, kunnu venda sær til Hans Jacob Hjelm umvegis teldupost: hansjacobhjelm@yahoo.com – og uppgeva navn, bústað og konto-nummar, har peningurin skal flytast aftur á.
Tey, sum ikki venda sær til okkara við fráboðan um at fáa peningin endurgoldnan, verða skrásett sum luttakarar í Dansibandsfestivalinum 2021.

Var alt sum vanligt, so vóru vit longu væl ígongd við Dansibandsfestivalin 2020 við fjøltáttaðar og spennandi skrá, men hesum hevur corona-støðan forðað fyri.

Skoytast kann uppí, at Dansibandsfestivalurin er fyribils útsettur. Verða tilmælini fyri summarið broytt í mai mánað, so verður støða tikin til um Dansibandsfestivalurin verður í summar og lýst verður sjálvsagt nærri, tá tann avgerðin er tikin.

Men hóast ongin Dansibandsfestivalur er hetta vikuskiftið, so skulu tit nógvu, sum høvdu ætlanir um at leggja leiðina til Vágs hesa vikuna, ikki verða heilt við sviðið soð.

Tí leygarkvøldið kl. 21 fara Hans Jacob & Vinmenn at spæla góðan dansitónleika í VB-húsinum sum verður stroymaður á facebook síðuni hjá Dansibandsfestivalinum.

Vit gleða okkum at geva tykkum eitt sindur av Dansibandsfestival-kensluni, nú tað ikki ber til at geva tykkum framúr góðu upplivingarnar á Dansibandsfestivali í Vági.

Stroymað verður á Facebook síðuni Dansibandsfestivalurin í Vági og byrjað verður kl. 21.

Fyri einum mánaði síðani varð boðað frá, at Dansibandsfestivalurin 2020 er útsettur orsaka av corona-støðuni, og tað vil siga, at Dansibandsfestivalur ikki verður í Vági sum ætlað nú komandi vikuskiftið.

Støðan við Corona-smittuni, sum herjar allan Heimin, ávirkar sjálvsagt eisini hjá okkum í Føroyum. Og av somu orsøk er Dansibandsfestivalurin eisini útsettur og verður ikki í døgunum 1. og 2. mai 2020, sum upprunaliga ætlað.

Eitt av hátíðarligu tiltøkunum á Dansibandsfestivalinum, sum altíð savnar sera nógv fólk, er Dansibandsgudstænastan.

Áhugin fyri Dansibandsfestivalinum er vaksin ár um ár og í ár er áhugin størri enn nakrantíð fyrr.

Áhugin fyri Dansibandsfestivalinum er metstórur og tað eru bert heilt fá kampingpláss eftir til Dansibandsfestivalin.

Eitt av allarkendastu dansibandsorkestrunum í Norðurlondum norsku INGEMARS koma á Dansibandsfestivalinum í Vági 2020.

Dansibandsfestivalurin bjóðar øllum dansi-áhugaðum føroyingum til Vágs til dans fríggjakvøld og leygarkvøld, til brunsj og grillkvøld, dansibandsgudstænastu, gongutúr í náttúruni og ikki minst hugna og gestablídni.

Norsku Contrazt leggur í mai mánað leiðin til Føroyar, til Vágs at spæla á Dansibandsfestivalinum.